With him ther was his sone, a yong SQUYER,
A lovyere, and a lusty bacheler,
With lokkes crulle, as they were laid in presse.
Of twenty yeer of age he was, I gesse.
Of his stature he was of evene lengthe,
And wonderly deliver, and greet of strengthe.
And he had been sometyme in chivachye,
In Flaundres, in Artoys, and Picardye,
And born him wel, and of so litel space,
In hope to stonden in his lady grace.
Embrouded was he, as it were a mede
Al ful of fresshe floures, whyte and rede.
Singinge was he, or floytinge, al the day;
He was as fresh as is the month of May.
Short was his goune, with sleves longe and wyde.
Wel coude he sit on hors, and faire ryde.
He coude songes make and wel endyte,
Just and eek daunce, and wel purtreye and wryte.
So hote he lovede, that by nightertale
He sleep namore than dooth a nightingale.
Curteys he was, lowly, and servisable,
And carf biforn his fader at the table.
—Geoffrey Chaucer, *The Canterbury Tales*, General Prologue, ll. 79-100
*deliver*: active, clever.
*floytinge*: playing on the flute.
*just*: joust, tilt.
*lusty*: high spirits.
*purtreye*: portray, draw.